አዲስ አበባ ፣ ጥቅምት 24 ፣ 2006 (ኤፍ.ቢ.ሲ) የኢትዮጵያ አየር መንገድ የአህጉሪቱ ምርጥ አየር መንገድ ተብሎ ለመሸለም የበቃው በአፍሪካ ካሉ አየር መንገዶች ጋር ተወዳድሮ በማሸነፉ ነው፡፡

አየር መንገዱ ከዚህም በተጨማሪ በአህጉሪቱ ምርጥ የአውሮፕላን ሰራተኞችን ሽልማትንም ጭምር ያሸነፈ ሲሆን ፥ ሽልማቱንም  በናይጄሪያ ሌጎስ በተደረገ ዝግጅት ላይ ተቀብሏል።

በተመሳሳይ የቦሌ አለም አቀፍ የአውሮፕላን ማረፊያም በምስራቅ አፍሪካ ምርጡ የአውሮፕላን ማረፊያ ተብሎ ተሸላሚ ሆነዋል፡፡

በሽልማት ስነስርዓቱ ላይ የተገኙት የኢትዮጵያ አየር መንገድ አለምአቀፍ አገልግሎት ክፍል ዳይሬክተር አቶ ኢሳያስ ወልደማሪያም እንዳሉት ፥ ሽልማቱ ባለፉት 70 ዓመታት አየር መንገዱ ለአህጉሪቱ ላበረከተው አገልግሎት ህያው ምስክር ነው ብለዋል፡፡

ዳይሬክተሩ አያይዘውም አየር መንገዱና የቦሌ አለም አቀፍ አውሮፕላን ማረፊያ ለሶስቱም ሽልማት የበቁት ፣ ለአፍሪካ ብሎም ለአለምአቀፍ ተገልጋዮች ጥራቱን የጠበቀ የደንበኞች አገልግሎት በመስጠቱ እንደሆነ ነው የገለፁት፡፡

በአሁኑ ሰዓትም አየር መንገዱ በአፍሪካ በ47 መዳረሻዎች አገልግሎቱን እየሰጠ ይገኛል፡፡

ምንጭ:  ዚስ ደይ ላይፍ